Australia a a om Zomi khempeuh Zomi Association Australia (ZAA) minin khut kong len hi.
I lametna bangin I pawlpi min tawh a kisam Sia Langh Do Khup pen Pasianin hong thukimpihin eite tawh hun hong zang thei ahih manin I biak Pasian min ka phat a, sum leh pai tawh ma hong pang khempeuh tungah zong lungdam thu ka hong puak hi.
I theihsa mah bangin I pawlpi ZAA in Australia a om Zomite khempeuh huam kim a, Siapa I sapna tawh kisaiin makaite bek malaakna hiloin nam khat banga mapangkhawm a I sepkhopna gah uh ahih lam I phawk ding deih huai kasa hi. Tua hi a, sum a tam piak deuh hiam a tawm piak deuh hiam, a pia man nailo I om phial a leh zong I Siapa’ hong puak thuphate ei a ding hi ci a, kisuanglahlo tak leh lungsim kihong tak a hunzatna khempeuhah I kihelkim ciat ding I kideihsak mahmah hi.
Eite khempeuh taanga zin hong do sak, tha leh zung siit hetlo a a kisapna bangbang a a diang suk a diangto Pa Zo Khaite’ innkuan tungah I lungdamna lian hi.
Siapa pen a kuama tekin itin I neek ngaih ciat a, ahi zongin Siapa in eite tawh a om khop sungin a manpha pen a hun hong zatpih ut ahih manin, hunawl I piak siam ding uh zong ka hong ngen nuam hi. Tua ahih manin, kikholhpih nuam leh annek pih nuam ciat I hih manin I kihawm kim theihna dingin Sia Khup hun leh vaai ding a geel ZAA makaite tungah theisak masa leng hoih dingin ka lamen hi.
Neihsa kicing a omloh baanah Siapa hong paina leh ciahna ding nangawn a kicing kinei lo hi napiin, a kisam laite ngah beh ding upna tawh a kisam ahi hi. Sum leh paai kisam lai I hih manin Siapa tungah huhna a pia nuam ahi zongin I pawlpi ZAA a phungvuh nuam I om leh kinuam mahmah ding hi.
Deihsakna lianpi tawh,
Pa Tun Khan Pau
President, Zomi Association Australia
