Ka Pa Neng Za Dongh tungtang lungdam kohna
Dear Sanggamte
Ka Pa, Neng Za Dongh in, awmsung natna tawh 3rdJan,2010 zingsang nai 7:00am(Local time) in, Lamka pan hong nusia a, tua ni mah in, tanau sanggam u leh nau, beh leh phung te leh New Lamka YPA te huh na tawh, Mawtaw nih tawh, Behiang-Khenman gamgi ciang hong puak sak uh a tanau pawlkhat in zong khua dong hong zui suak uh hi., Cikha pan, Khuapih ten Nukhek te mawtaw nih, Sia Enthang te mawtaw tawh, Mawtaw thum in, na dawn a, tua ni mah in, khua hong tun sak uh hi.
Ka Pa luangpen, Yangon pan Ka U Kam Cin Pau leh ka nau Man Lal Lian te tun loh in, ki vui thei lo ding a hih manin, Ka U te paitoh theih na ding lamsap sum leh paii leh mawtaw a ki pan, Ka Pu Sian Khaw Thang leh Ka Pu Pau Lun in hong vaihawm sak hi. Mandalay panin, Sia Pau Khai zi in, mawtaw a mansa in, na koihsak a, tua tawh Kawlpi paisuak thei pah uh hi, Kawlpi panin, Sia Go Mun Thangin, mawtaw na vaihawmsak leuleu in, Cikha 5/1/2010 ni in, cidam in, tungto uh a, Ka Pa luanghawm leiah tuh na ding tawh ki sai in, Innlam a ten tuani mah gelsa hi ta leh khualzin hong tungte gimlua dinguh ahih ciang, ci in, a zingciang a, vui ding, na khek kik uh hi.Ka Pa luanghawm pen, 6/1/2010 ni in, gelna bangin, nawngkaina om lo in, hanlam ki tangsak thei hi.
A sih a, kipan a vuikhiat dong ban ah tuni ciang dong kitat sat lo, Khuapih sanggamten innah hong giahpih, hong khawlpih lai uh hi. A khual a tual panin, hong dahpih, hong gimpih hong tawlpih te anvak na dingin, Ka Pu Sia En Thang te in, vok khat, Ka Pu Khamta in, vok khat, Ka Pa Thawngin, Vok khat, Ka Pa Lian in, Bawngkhat, inn pan in,Bawng khat leh Lawi 2 ki go hi.
Yangon Ka u te omna ah zong ka Pu Dr. Rev Thawng Za Mungte makaihna tawh hunbawlna hong neihpih uh hi.
Melbourne ah zong Laizom Zomi a kua mah peuh in, hongdah pih in, a sih ni a kipan, a sun a zan in hong ki khawlpih ban ah, nitak sim in, hehnep hunzat na Melbourne ZCF, MBCC, leh ZAA ten hong neihpih den uh hi.
Lungdamkohna
Hihbangin, ka Pa hong nusiatna hanga, hongdahpih, hong thuak pih a, nong-uapna te uh ka muh ciangin, nongitna uh leh ih Biak PASIAN na itna te uh ka tela, ka nuam mahmah uh hi. Tuabanah a sum a paii a hi, a, thagui thatang a hi zongin, hongpanpih kei le uh cin, ko hi ciangtung lo ding leh vaihawm theilo ding ka hih man un, nakpi tak in, ka lungdam uh hi. Bek tham lo in, ih om na a kibat loh hang, laizom mimal khat ciat in phone leh Internet tungtawn in, ih Cikha yahoo group pan, Melbourne-Zomi yahoogroup pan, Tongsanpan in, zong dahpihna nong khak nate uh hangin, ka lungdam mahmah uh hi.
Hih lungdam kohna sungah mimal in, na min uh hong lo kim zolo ka hih manin, thu hong ngetsak, hongdahpih, hong lainat pih mimal kim ciat, ih biak PASIAN in, thupha tawh hong thukkik tahen. Amen.
Mihing hihnatawh kicinna neilo ka hih man un, lungdamkoh dinga ki lawm mahmah kong mangngilh khak uh leh, genkhial sutkhialh a om khak zenzen leh nong maisak ding uh kong thuum uh hi.
Nasanggam uh,
Nangkhankhup Naulak
Melbourne
Comments (0)
Write comment
You must be logged in to post a comment. Please register if you do not have an account yet.
