ZRA in a salphate suun
SoO or not... kihumbitna ding thuneihna ka nei uh: ZRA
LAMKA, Jan 15:
Zomi Revolutionary Army (ZRA) in gal a si Pvt. Thangminlun @ Tiger (30) leh Pvt. Thangzamuan (22) @ Mark suun thu puang kawm in a chihtakna uh leh gam a dia a kipiakna uh khangsawnte a dia etton tham ching hi’n taklang hi.
Ministry of Information and Public Relation secretary apat tuni a thusuak in, RPF/PLA in ngohna belhchian dawllou a bawl AIR Imphal in a puan lamdang sak thu taklang hi. Thiltung pen Indian Army toh “combined action/joint operation” hilou a, ‘Khristmas Thilpiak’ dan a MPLA in a ziak omlou a apaisa Dec. 24, 2009 a ZRA Hiangtam (K) Camp a kap uh thukna hizaw hi’n thusuak in taklang hi. AIR Imphal tel in phaizang pansan niteng tanchinbu khenkhat in, ZRA leh Indian Army kithuahte’n PLA pawl kap uh hidan a RPF/PLA’ ngohna suah uhi.
Thusuak in, phaizang pansan helpawl khenkhat in chindan hoihloutak, Khristmas ahihkeileh Kum Thak ‘thilpiak’ dan a officer liante tel a mohna neilou singtangmite thah ching uh hi’n taklang a, Khristiante douna hia, ahihkeileh singtangmite thah chimit sawmna hizaw hiam chi’n dotna bawl hi. ‘Revolutionary organisation’ khat hingal a khovel pumpi in a mohpaih uh Burmese Military Junta paidan zuihpih pen lamdang mahmah ahihdan taklang kawm in democracy a kivaipuak Manipur state a Burma kivaihawmna bangbang puaksuah ‘ut taktak ihi uh hiam’ chi’n leng dotna bawl hi.
Tua banah, Zomite sukbuai leh ziak omlou a ZRA dou tawpsan di’n thusuak in a kisaipih galvan tawi pawl ngen hi. Himahleh, a paidan uh a bawldik kei ua leh, Vietnam a US Army in a tuah bangbang ua gamdang a zohlouh ding gal bawl suak ding uh hi’n vau hi. Huai banah, “SoO nuai ah om in omkeita le ung leng, chiklai peuh leh koimun peuh ah ka gam uh leh ka mipite uh humbitna ding thuneihna ka nei uh” chi’n MIPR apat thusuak in taklang hi.
By The Lamka Post
